२०७७ कार्तिक १४, शुक्रबार

लडाकू कमाण्डर मारिएको विप्लवद्वारा स्वीकार

काठमाडौं । काठमाडौंमा भएको श्रृंखलाबद्ध बम विस्फोटमा मारिने चारै जना नेकपा विप्लव समूहले आफ्ना कार्यकर्ता भएको स्वीकार गरेको छ । पार्टी महासचिव नेत्रविक्रम चन्द विप्लवले सोमबार विज्ञप्ति जारी गर्दै विस्फोटमा महान, दीपेन्द्र, प्रज्वल शाही र निरन्तरको मृत्यु भएको स्वीकार गरेका छन् ।

मारिनेमध्ये एक जना जनमुक्ति सेनाका कमाण्डरसमेत भएको खुलेको छ । तर, मृतकमध्ये को जनमुक्ति सेनाका कमाण्डर हुन् भन्ने खुलाइएको छैन । विज्ञप्तिमा ‘जेठ १२ गते काठमाडौंमा भएको विस्फोटमा पार्टी, जनमुक्ति सेना, जबसका कमाण्डर’ भन्दै क्रमशः महान, दीपेन्द्र, प्रज्वल र निरन्तरले सहादत पाएको लेखिएको छ । विप्लव समूहले घटना कसरी भयो भन्ने सत्यतथ्य बाहिर ल्याउने बताएको छ ।

तर, यसको मुख्य दोषी सरकारको फाँसीवादी दमन भएको बताएको छ । प्रहरीका अनुसार भने बम बिस्फोट हुँदा सुकेधारामा २७÷२८ वर्षका कालिकोटका विभुराम भन्ने दिपेश विक, ३२÷३३ वर्षका दाङको बबई गाउँपालिकाका गोकुल राना मगर र ठेगाना नखुलेका निरन्तर मल्लको मृत्यु भएको छ । घट्टेकुलो बिस्फोटमा प्रज्वल शाहीको मृत्यु भएको थियो ।