२०७७ कार्तिक ४, मंगलवार

नेकपा सांसदको एउटै बोली : गुठी विधेयक फिर्ता लिनुस्

चर्चित गुठी विधेयकबारे प्रधानमन्त्री केपी शर्मा ओलीलाई भेट्नुअघि काठमाडौं उपत्यकाका नेपाल कम्युनिष्ट पार्टीका सांसदहरूले पार्टीका सचिवालय सदस्य माधवकुमार नेपालसँग छलफल गरेका छन्।


गुठी विधेयकविरूद्ध काठमाडौंमा भएको प्रदर्शन। फाइल तस्बिर 

नेकपा संसदीय दलको कार्यालय सिंहदरबारमा सोमबार भएको छलफलमा सांसदहरूले अहिले सरकारले गुठी विधेयक फिर्ता लिनुको विकल्प नरहेको र प्रधानमन्त्रीसँग पनि त्यही कुरा राख्नु पर्ने बताएका थिए।

जवाफमा नेपालले उपत्यकाका सबै सांसदको कुरा त्यही हो भने आफ्नो पनि सहमति रहने बताए।

बैठकपछि नेकपाका सांसद कृष्णलाल महर्जनले सेतोपाटीसँग भने, ‘प्रधानमन्त्री केपी शर्मा ओलीलाई भेट्न जानुअघि हामीले माधव कमरेडसँग भेट्यौँ, उहाँले हामी सबैको नेतृत्व गर्दै गुठी विधेयक फिर्ता लिन प्रधानमन्त्रीसँग आग्रह गर्ने समझदारी भएको छ।’

महर्जनले काठमाडौं बाहिर र काठमाडौंभित्रका गुठीको समस्या फरक भएकाले त्यही अनुसार सम्बोधन गर्नुपर्ने विषयमा पनि छलफल भएको बताए।

‘तर अहिले गुठी विधेयक फिर्ता लिनुको विकल्प छैन, हामी उपत्यकाका सांसदबीच त्यही छलफल भएको छ,’ महर्जनले भने।

प्रधानमन्त्री ओलीले काठमाडौं उपत्यकाका सांसद, मेयर, केही वडाध्यक्ष र गुठियारलाई छलफलका लागि बालुवाटार बोलाएका छन्।

उनीहरूसँग छलफल गर्नुअघि प्रधानमन्त्रीले भूमि व्यवस्था, सहकारी तथा गरिबी निवारण मन्त्री पद्मा अर्याललेसँग ब्रिफिङ लिएका थिए।