२०७७ माघ ४, आईतवार

पढाई सीप विकासका लागि सन्दर्भ सामग्री वितरण सुरु अब एकदेखि तीनसम्म कक्षामै पुस्तकालय

deeo

सुर्खेतका हरेक सामुदायिक विद्यालयका कक्षा एकदेखि तीन कक्षासम्म अब कक्षा पुस्तकालय हुने भएको छ ।
विद्यार्थीहरुको लेखाई र पढाईको सीप विकास गर्नका लागि सुर्खेतका सामुदायिक विद्यालयहरुका कक्षा कएदेखि तीनसम्म कक्षा मै पुस्तकालय स्थापना गर्न लागिएको हो ।

‘विद्यालय क्षेत्र सुधार कार्यक्रम’ ले प्राथमिक तहका सिकाई कमजोर हुनुमा आधारभूत रुपमा पढाई र सीमको कमजोरी भएको निष्कर्ष निकालेपछि कक्षा एक–तीन लाई मध्यनजर गरी सञ्चालनमा ल्याइएको ‘राष्ट्रिय प्रारम्भीक कक्षा पढाई कार्यक्रम’ सुरु भएपछि सुर्खेतका सामुदाियक विद्यालयका कक्षा एकदेखि तीनसम्म पुस्तकालय स्थापना हुने भएको हो ।

यूएसएआइडिको आर्थिक सहयोग तथा रिसर्च ट्रयाङगल इन्स्टिच्यूट (आरटीआई) इन्टरनेशनलको प्राविधिक सहयोगमा सुर्खेत सहित देशभरका अन्य १६ जिल्लाहरुमा पनि यो कार्यक्रम सञ्चालन भएको छ ।

यो कार्यक्रम अन्तर्गत सुर्खेतमा रहेका पाँच सय ११ सबै सामुदायिक विद्यालयका कक्षा एकदेखि तीन कक्षासम्म कक्षा पुस्तकालय स्थापना गरिने छ । पहिलो चरणमा विद्यालयहरुलाई सन्दर्भ पुस्तक वितरण गर्ने कार्यक्रम रहेको छ । पुस्तक वितरण कार्यक्रम पनि दुई चरणमा राखिएको छ ।

पहिलो चरणमा एउटा विद्यालयमा एक सय ९८ का दरले पुस्तक वितरण गरिनेछ भने दोस्रो चरणमा २ सय ४० का दरले सन्दर्भ पुस्तकहरु वितरण गरिने आरटीआई र युएसएआइडि अन्तर्गत यस कार्यक्रमका जिल्ला कार्यक्रम संयोजक नरेशविक्रम ढकालले जानकारी दिए ।

त्यसपछि कक्षामा पुस्तकालय स्थापना गर्ने, प्राथमिक तहका सबै शिक्षकहरुलाई सन्दर्भ पुस्तक तथा सामग्रीहरुको प्रयोग सम्बन्धी तालिम दिने र कक्षा कोठा व्यवस्थापनका लागि आर्थिक सहयोग समेत उपलब्ध गराइने कार्यक्रम संयोजक ढकालले जानकारी दिए ।

यस्तै अभ्यास पुस्तिका, शिक्षक सहयोगी सामग्रीहरु, विद्यार्थी पठन सामग्रीहरु पनि वितरण गरिनेछ । ‘‘यो कार्यक्रम अन्तर्गत एक देखि तीन कक्षासम्म सन्दर्भ पुस्तक वितरण गर्ने काम सुरु भएको छ,’ उनले भने–‘त्यसपछि शिक्षकहरुलाई तालिम र कक्षा कोठा व्यवस्थापनका लागि आर्थिक सहयोग समेत उपलब्ध गराउने कार्यक्रम छ ।’’

नेपाल सरकारसंगको समन्वयमा सन् २०२१ सम्म सञ्चालन हुने यो कार्यक्रम अन्तर्गत सुर्खेतमा पहिलो चरणको कार्यक्रम सुरु भएको छ । एक देखि तीन कक्षासम्म बालबालिकाहरुलाई पढाई सीपको विकास गर्नका लागि सोमबारदेखि सन्दर्भ पुस्तक वितरण सुरु गरिएको छ ।

यहाँको वीरेन्द्रनगर नगरपालिका–६ मा रहेको नेपाल राष्ट्रिय उच्च माध्यामिक विद्यालयमा एक कार्यक्रमको आयोजना गरी सन्दर्भ पुस्तकहरु वितरण गरिएको हो । कार्यक्रममा यहाँका जिल्ला शिक्षा अधिकारी जीतबहादुर शाहले विद्यालयका प्राध्यानाध्यापक शान्ता केसीलाई सन्दर्भ पुस्तक र तीन थान ह्याङगर हस्तान्तरण गरेका थिए ।

सन्दर्भ पुस्तक वितरण गर्ने पहिलो चरणको कार्यक्रम अन्तर्गत सोमबार जिल्लाका करिब दश विद्यालयहरुमा एक सय ९८ का दरले पुस्तक वितरण गरिएको छ । सोमबार श्री कृष्ण संस्कृती तथा साधारण उच्च मावि, नेरा निमावी चिसापानी, भैरव उमावि भैरभस्थान लगायतका विद्यालयमा पनि सामग्री हस्तान्तरण गरिएको छ ।

कार्यक्रममा जिल्ला शिक्षा अधिकारी शाहले सन्दर्भ सामग्रीहरुको शिक्षकहरुले उचित प्रयोग गराउन सके सरकारले गरेको अपेक्षा पुरा हुने बताए । सोही कार्यक्रममा जिल्ला शिक्षा अधिकारी शाहले आफूले शिक्षा ऐन अनुसार काम गर्न प्रतिवद्ध रहेको र सबैले सोही अनुसार काम गरे सुर्खेतको शैक्षिक गुणस्तर बृद्धिमा सहयाृेग पु¥याउने बताए ।

कार्यक्रममा राष्ट्रिय प्रारम्भीक पढाई कार्यक्रमका फोकल पर्सन तथा विद्यालय निरीक्षक गजेन्द्र जि.सी, सम्बन्धित क्षेत्रका विद्यालय निरीक्षक बलवीर सुनार लगायतको सहभागिता रहेको थियो । पहिलो चरणको पुस्तक वितरण कार्यक्रम डिसेम्बरको अन्तिमसम्ममा सम्पन्न हुने जनाइएको छ ।

यो कार्यक्रम अन्तर्गत जिल्लाका एक हजार ६४ जना शिक्षा सरोकारवालाहरुलाई तालिम पनि दिइसकिएको छ । अब कार्यक्रमलाई सफल पार्न परिवार तथा समाजलाई बालबालिकाको पढाई सीप विकास गराउन सामाजिक परिचालन अन्तर्गत गैरसरकारी संस्था छनौट गरिने छ । त्यससंगै २८ जना सामाजिक परिचालक गैसस अन्तर्गत र २८ जना पढाई उत्पे्ररक जिल्ला शिक्षा कार्यालयका तर्फबाट नियुक्त गरिने छ ।

१६ जिल्लामा सञ्चालन भएको यो पाँच वर्षे कार्यक्रमका लागि ७०.७६ करोड अमेरिकी डलर अर्थात ६ अर्व ७२ करोड २५ लाख २० हजार नेपाली रुपैयाँ बजेट रहेको छ ।